Kryeministri Dimitar Kovaçevski sot në New York ka mbajtur një takim të rëndësishëm me drejtoreshën operative ekzekutive të Bankës Botërore, Anna Bjerde, njoftojnë nga shtypi i qeverisë.
Në takim, theksojnë nga atje, u përshëndet partneriteti 30-vjeçar i Maqedonisë së Veriut me Grupin e Bankës Botërore, i përkthyer në mbështetje financiare dhe teknike që pashmangshmërisht ka një kontribut të madh në segmente të rëndësishme të shoqërisë dhe ekonomisë sonë.
“U diskutua për realizimin e portofolit aktual të projekteve dhe asistencës teknike në vlerën rreth 400 milionë USD.
Vëmendje e veçantë iu kushtua bisedave për përgatitjen e Kornizës së re të Partneritetit të Republikës së Maqedonisë së Veriut me Bankën Botërore në drejtim të rritjes së ndjeshme të mbështetjes financiare për vendin tonë, pothuajse dyfish më i lartë se më parë.
Bashkëpunimi i ardhshëm përfaqëson vazhdimësinë e reformave të mëparshme strukturore dhe investimeve të rëndësishme në fushën e infrastrukturës, kapitalit njerëzor, mjedisit, energjisë, konkurrencës dhe mjedisit të biznesit. E gjithë kjo, siç u vlerësua bashkërisht në takim, është një konfirmim i mbështetjes që vjen nga një partner serioz dhe dërgon një mesazh të fortë për partnerët dhe investitorët ndërkombëtarë”, thonë nga Qeveria.
Nga atje shtojnë se në periudhën e ardhshme pritet mbështetje direkte buxhetore nga Banka Botërore për zbatimin e reformave të rëndësishme, rezultati përfundimtar i të cilave do të jetë krijimi i një ekonomie elastike dhe të gjelbër, përmes rritjes së qëndrueshme dhe gjithëpërfshirëse./Telegrafi/