Mbrojtësi i Barcelonës dhe Francës, Jules Kounde është ankuar për agjendën e ngjeshur dhe numrin e madh të ndeshjeve që duhet të luajnë futbollistët.
Në një intervistë për televizionin francez CANAL+, ai theksoi se kjo është arsyeja që po rritet numri i lëndimeve.
“Ka shumë ndeshje. Ritmi po bëhet gjithnjë e më i egër dhe po bëhet gjithnjë e më i rrezikshëm, ka shumë lëndime dhe atë të rënda”.
“Më shqetëson që sa herë që flasim kundër, njerëzit thonë: “Epo edhe ne luajtëm shumë!’ “Edhe nëse kjo është e vërtetë, nuk do të thotë se ishte mirë në atë kohë”, ka thënë Kounde.
Kujtojmë se Kounde është në Barcelonë që nga vera e vitit 2022, kur erdhi nga Sevilla në një transferim prej 50 milionë eurosh.
Para Sevillas, ai luajti vetëm për Bordeaux. Mbrojtësi fitoi medaljen e argjendtë me Francën në Kampionatin Botëror në Katar. /Telegrafi/