Kosova do të zhvillojë takimin e dytë në Ligën e Kombeve, pas barazimit 1-1 që mori ndaj Moldavisë në Parma të Italisë.
Përfaqësuesja jonë do të përballet sonte nga ora 20:45 me Greqinë në kuadër të Ligës C në stadiumin “Fadil Vokrri”.
‘Dardanët’ do t’i kenë disa mungesa kyçe në formacion shkaku i gjendjes së krijuar nga COVID-19, mirëpo do ta kërkojnë me ngulm fitoren ndaj grekëve.
Transfermarkt, faqja që merret me vlerat e lojtarëve, klubeve dhe kombëtarëve, ka bërë të ditur se Kosova ka vlerën totale rreth 69, 13 milionë euro.
Në anën tjetër, Greqia ka një vlerë prej 70, 40 milionë euro, një diferencë kjo e ngushtë mes dy skuadrave.
Pozicionimi i “Dardanëve” gjendet në vendin e 115-të, ndërsa Greqia në pozitën e 54-të. Sa i përket formës Kosova ka dy fitore, dy humbje dhe një barazim – Greqia ka tri fitore, një humbje dhe një barazim.
Si Kosova, ashtu edhe grekët do të kenë mungesa kyçe në skuadër, derisa në ndeshjen e parë barazuan pa gola ndaj Sllovenisë. /Telegrafi/
