Të enjten pasdite në Kopenhagë të Danimarkës është tërhequr shorti i fazës kryesore kualifikuese për Kampionatin Evropian për hendbollistë, Euro 2026.
Në këto kualifikime do të paraqitet edhe Kosova që është në grupin e gjashtë së bashku me Holandën, Ishujt Faroe dhe Ukrainën.
Në fakt, Kosova mund të kishte përballje me Serbinë, nëse do të lejohej nga Konfederata Evropiane e Hendbollit (EHF).
Shorti përcaktoi që Serbia të vendosej në Grupin 6, ku ishte Kosova. Por shorti u përsërit dhe Serbia më pas ra në Grupin 4. EHF-ja nuk lejon duelet e Kosovës me Serbinë.
“Grupi është sfidues, por Kombëtarja jonë e synon kualifikimin historik në Evropian”, thuhet në njoftimin e FHK-së.
Evropiani i ardhshëm për hendbollistë mbahet në Danimarkë, Suedi dhe Norvegji, përfaqësueset e të cilave vende kualifikohen direkt. Njëjtë është kualifikuar vetëm edhe kampionia në fuqi, Franca. Përmes kualifikimeve përcaktohen 20 përfaqësueset e tjera.
Pra prej 32 përfaqësueseve pjesëmarrëse kualifikohen 20. Kualifikimet zhvillohen në tetë grupe me nga katër përfaqësuese. Në Evropian shkojnë përfaqësueset e vendeve një e dy në secilin grup, si dhe katër përfaqësueset më të mira të vendit të tretë.
Në ceremoninë e shortit ishin edhe sekretari i përgjithshëm i FHK-së, Izet Gjinovci dhe drejtori i ekipeve kombëtare dhe marrëdhënieve me jashtë, Muhamet Arifi. /Telegrafi/