Kosova dhe Maqedonia nënshkruan sot një marrëveshje, e cila synon hapjen e pikës së re kufitare në Stançiq, duke i kontribuar bashkëpunimit të mëtejshëm ndër-kufitar në mes dy vendeve.
Marrëveshja u nënshkrua nga ushtruesi i detyrës së ministrit të Punëve të Jashtme të Kosovës, Emanuel Demaj dhe zëvendës-ministrja e Punëve të Jashtme e Maqedonisë, Arta Toqi.
Kjo është marrëveshje është vlerësuar si shumë e rëndësishme nga përfaqësuesit politik të të dyja vendeve, pasi që do të lehtësojë lëvizjen e lirë të qytetarëve nga të dyja anët e kufirit.
Ushtruesi i detyrës së ministrit të Jashtëm të Kosovës, Emanuel Demaj, tha se hapja e kësaj pike kufitare është e rëndësishme sidomos për banorët e Anamoravës, pasi do të kenë mundësinë e lëvizjes së lirë.
Edhe zëvendës-ministrja e Punëve të Jashtme e Maqedonisë, Arta Toqi, tha se hapja e kësaj pike kufitare është e rëndësishme, pasi që do të shkurtojë rrugën për 20 deri 25 kilometra, dhe shpreson që projekti do të përfundojë brenda një afati të shkurtër kohor.