Organizata “Miqtë e Amerikës” e ka shënuar përvjetorin e pavarësisë së SHBA-ve, 4 Korrikun me një ceremoni solemne tek busti i Bill Clinton në Prishtinë.
Me këtë rast Garda Ceremoniale e FSK-së e ka ngritur edhe një flamur të SHBA-së në sheshin që mban emrin e ish presidentit amerikan..
Përfaqësuesi i organizatës “Miqtë e Amerikës”, Agim Rexhepi, tha se me këtë aktivitet tregojnë falënderimin që e ka populli i Kosovës për popullin amerikan.
“Edhe këtë vit e kemi organizuar manifestimin ‘Faleminderit SHBA apo Thank You USA’. Qëllimi i organizmit të këtij evenimenti është me tregu një respekt në formë konkrete për SHBA-të, për krejt atë që e kanë bërë për popullin e Kosovës, institucionet e Kosovës në përgjithësi para luftës, gjatë luftës, pas luftës edhe që do të bëjnë me siguri edhe nesër”, tha Rexhepi.
Falënderim për shqiptarët shprehu edhe një pjesëtar i trupave të KFOR-it amerikan në Kosovë, Tod Jacobus, i cili tha se është i habitur nga rëndësia që i kushtohet kësaj feste në Kosovë.
“I falënderoj të gjithë që e kanë organizuar këtë shënim të ditës së Amerikës. Jam i befasuar nga kjo që e shoh sepse nuk e kam besuar që në Kosovë i kushtohet kaq rëndësi e madhe kësaj dite”, tha Jacobus.
Dita e Pavarësisë së SHBA-ve në Kosovë shënohet çdo vit me aktivitete simbolike në shenjë falënderimi për mbështetjen e shtetit tonë nga Amerika.
Gjatë ditës shoqata “Miqtë e Amerikës” do të zhvillojnë edhe disa aktivitete tjera në qytetin e Vushtrrisë.