Nën urdhrat e trajnerit të ri, Alain Giresse, Kosova i ka zhvilluar edhe stërvitjen e dytë para ndeshjes miqësore kundër Burkina Fasos që zhvillohet të enjten në stadiumin “Fadil Vokrri”.
Ajo që vlen të përmendet është se skuadra është e kompletuar nga lojtarët që janë ftuar nga trajneri francez, përveç Emir Sahitit që pësoi lëndim dhe u zëvendësua menjëherë nga Lumbardh Dellova, raporton KosovaPress.
Yje, si Vedat Muriqi, Edon Zhegrova, Mërgim Vojvoda, Amir Rrahmani, Milot Rashica, Valon Berisha e të tjerë, u paraqitën të gatshëm dhe në formë të mirë gjatë kësaj seance stërvitore.
Në 20 minuta stërvitje që ishin të hapura për media, lojtarët bënë nxehje dhe vrapim të lehtë.
I pranishëm në stafin e trajnerëve ishte dhe Primoz Gliha, i cili e drejtoi skuadrën pas shkarkimit të Bernard Challandes.
Pas Burkina Fasos, Kosova luan edhe një tjetër ndeshje miqësore, atë kundër Zvicrës në Cyrih.
