Në ambientet e MMPH-së, është zhvilluar takimi i radhës i grupit punues për bashkëpunim ndërkufitar ndërmjet Republikës së Kosovës dhe Republikës së Shqipërisë, lidhur me mbrojtjen e vlerave natyrore për shpalljen e Malit “Pashtrik” – Vërmicë (lugina e Drinit të Bardhë) – Liqeni i Fierzës” zonë e mbrojtur natyrore.
Ministri Ferid Agani, i përgëzoi për punën të dy grupet dhe premtoi se do të kenë mbështetjen e tij.
Agani i njoftoi të pranishmit për nënshkrimin e një marrëveshje me projektin SIDA, një ndër çështjet që do të përkrahet janë edhe projektet ndërkufitare që do të parashihen të jenë me vlera reale si projekte prioritare.
Të dy palët u pajtuan që të shpejtohen procedurat që edhe pjesa e Malit Pashtrik dhe Liqeni i Fierzës të shpallet zonë e mbrojtur ndërkufitare nga Shteti Shqiptar, të hartohen planet e përbashkëta menaxhuese për zonat ndërkufitare Kosovë –Shqipëri, në mënyrë që të mundësohet aplikimi në fondet ndërkombëtare, për zonën ndërkufitare Kosovë – Shqipëri të bëhet i përbashkët dhe të fillojë puna për hartimin e koncept idesë. /Telegrafi/