Ylli i ri i Prishtinës, Meriton Korenica, është shprehur jashtëzakonisht i dëshpëruar pas pamundësisë për të siguruar rrethin e dytë të kualifikimeve të Europa League me klubin nga kryeqyteti.
Prishtina u eliminua pas penaltive pasi dy ndeshjet përfunduan pa gola me skuadrën Fola Esch.
Korenica ishte një prej lojtarëve më aktiv të ndeshjes duke krijuar shumë raste e duke u gjetur edhe vet në pozitë shënimi, teksa as tri penalti vendimtare nuk u konkretizuan nga Prishtina duke u eliminuar kështu nga kualifikimet e Europa League.
Dhe, reprezentuesi i Kosovës U-21 ka shprehur keqardhjen dhe ka kërkuar nga të gjithë që të jenë sa më të bashkuar.
“Falënderoj tifozët që udhëtuan, dhe u kërkoj falje atyre që i zhgënjyem. Synimi jonë ishte që të gëzojmë tifozët dhe të bëjmë krenarë të gjithë, ishim vetëm një penalti larg që ta bëjmë këtë. Zhgënjimi është i madh, por kjo është pjesë e futbollit”.
“Nuk është momenti për t’u kthyer dhe për të menduar për atë ndeshje. Është koha të jemi sa më të bashkuar me tifozët, kryesinë, me trajnerin dhe me bashkëlojtarët, që së bashku të shkojmë përpara në sezonin e ri. Tash mendojmë për Superkupën e Kosovës ku e kemi një mundësi për të fituar trofeun e parë të sezonit”, u shpreh Korenica për Telegrafin.
Korenica kaloi te Prishtina në qershor si transfer i lirë pasi shkëputi marrëveshjen me Lirinë. Ai shënoi qysh në debutim ndaj FC Europas në Gjibraltar dhe është shndërruar në një prej ogurëve kryesorë të lojës dhe formacionit të trajnerit, Mirel Josa. /Telegrafi/