Koreja e Veriut është gati të mbyllë një numër të konsiderueshëm ambasadash, duke përfshirë në Spanjë, Hong Kong dhe shumë vende në Afrikë, sipas raporteve të mediave, në një lëvizje që mund të mbyllë gati 25 për qind të misioneve të Phenianit në mbarë botën.
Sipas mediave të huaja, përcjell Telegrafi, të hënën, media shtetërore e Koresë së Veriut KCNA tha se ambasadorët e vendit bënë vizita “lamtumirëse” te liderët e Angolës dhe Ugandës javën e kaluar dhe mediat lokale në të dy vendet afrikane raportuan mbylljen e ambasadave të Veriut atje.
Mbyllja e ambasadave hapi rrugën për atë që mund të ishte “një nga lëkundjet më të mëdha të politikës së jashtme të vendit në dekada”, me implikime për angazhimin diplomatik, punën humanitare në vendin e izoluar, si dhe aftësinë për të gjeneruar të ardhura të paligjshme, shkroi Chad O’ Carroll, themelues i faqes së internetit të fokusuar në Korenë e Veriut NK Pro.
Më shumë se një duzinë misione mund të mbyllen, me gjasë për shkak të sanksioneve ndërkombëtare, një tendencë të shkëputjes së Phenianit globalisht dhe dobësimit të mundshëm të ekonomisë së Koresë së Veriut, tha ai në një raport të mërkurën.
Ministria e bashkimit e Seulit, e cila merret me çështjet ndër-koreane, tha se tërheqja pasqyronte ndikimin e sanksioneve ndërkombëtare që synojnë frenimin e financimit për programet bërthamore dhe raketore të Veriut.
Koreja e Veriut ka marrëdhënie zyrtare me 159 vende, por kishte 53 misione diplomatike jashtë shtetit, duke përfshirë tre konsullata dhe tre zyra përfaqësuese, derisa u tërhoq nga Angola dhe Uganda, sipas ministrisë. /Telegrafi/