Ka mbetur edhe pak kohë që nga edicioni i 21-të të festivalit “Kënga Magjike”, i cili çdo vit mbledh në një vend artistë nga të gjitha trojet shqiptare.
Dhe sivjet, përveç artistëve të rinj pjesëmarrës, është përfolur se do jenë edhe shumë këngëtarë të mëdhenj të skenës tonë muzikore.
Yjet të cilët ia kanë mësyrë kësaj gare, tashmë kanë përgatitur këngët me të cilat do të prezantohen, dhe në mesin e tyre është edhe këngëtari i njohur shqiptar, Korab Shaqiri.
Ky i fundit do të rikthehet në këtë kompeticion muzikor pas 11-të vitesh, ndërsa për herë të fundit u prezantua me këngën “Puthje e Hatrit”, në vitin 2008.
Për Telegrafin, Korabi ka zbuluar disa detaje rreth projektit të ri, që sipas tij është më i veçantë.
“Kënga titullohet ‘Fenomen’ dhe është shumë e veçantë, kompozimin dhe tekstin e kam bërë unë kurse për orkestrimin është përkujdesur Florent Boshnjaku”, ka thënë këngëtari Shaqiri për Telegrafin.
I njëjti më tej tregon se për dallim nga vitet tjera, sivjet do këndohet live dhe më datën 29 do të shfaqet te “E diela shqiptare”.
“Xhirimet e kësaj kënge do të bëhen më 27 shtator ndërsa më datën 29 do shfaqem te ‘E diela Shqiptare’ dhe do jetë gjithçka live”, ka thënë mes tjerash 31-vjeçari.
Përndryshe, gjysmëfinalja dhe nata e madhe finale e “Kënga Magjike 2019” do mbahen me 3, 4 dhe 7 dhjetor. /Telegrafi/