Koordinatori Nacional për Kulturë, Rini dhe Sport në Qeverinë e Republikës së Kosovës, Rexhep Hoti, i shoqëruar nga zëvendësministrja e Kulturës, Rinisë dhe Sportit, Leonora Morina-Bunjaku, është takuar me kryetarin e Komunës së Pejës, Gazmend Muhaxheri.
Sipas njoftimit për media, Hoti e Muhaxheri kanë biseduar për Programin Nacional për Rininë dhe mbarëvajtjen e garave të Kreativitetit Kulturor dhe Mendimit Kritik në Komunën e Pejës.
Në njoftim thuhet se koordinatori Hoti u njoftua nga afër me ecurinë e garave në nivel shkolle dhe atë komunal.
“Jam i lumtur që nëpërmjet Programit Nacional për Rininë talentët e të gjitha shkollave po mblidhen nëpër komuna. Jam i kënaqur me realizimin e garës në nivelin e shkollës dhe tani po pres mbështetjen tuaj për nivelin komunal të garës”, u shpreh Hoti.
Sipas njoftimit për media, kryetari Muhaxheri, ka theksuari se do ta mbështesë garën dhe se sipas tij tashmë Komuna që udhëheqë ai është duke u përgatitur për nivelet e garës.
“Përmes këtij programi ne kemi mijëra fitues që do të garojnë në nivelin komunal. Po ashtu, jemi shumë të kënaqur edhe me pjesëmarrjen e komunitetit boshnjak dhe mund të ju them se ky program ka marrë jehonë në mesin e nxënësve. Ne qysh tash kemi filluar me përgatitjen e garave sportive andaj ju premtoj mbështetje të plotë për këto gara”, ka thënë Muhaxheri.
Në njoftim thuhet se Hoti sot vizitoi edhe Komunën e Deçanit ku u prit në takim nga Drejtori Komunal i Arsimit, Bekim Vishaj, si dhe drejtoresha për Kulturë, Rini dhe Sport, Leonora Ukëhajrdaraj. Edhe në këtë komunë Hoti u njoftua për procesin e garës për të cilën drejtorët thanë se gjithçka është duke shkuar sipas planifikimeve./Telegrafi/
