“Kooperativa”, një ‘reality show’, i cili për bazë ka aksion humanitar, nesër (e mërkurë) do të startojë me emisionin e parë në orën 00:00 në RTK 1, ndërsa prej ditës tjetër, çdo minutë e sekondë të spektaklit do të mund ta ndiqni në kanalin RTK 3.
Ky spektakël mbështet në inciativën e ndërmarrë për të ndihmuar familje skamnore, ndërsa në këtë projekt mbështetës është dhe portali Telegrafi.
“Kooperativa Show” ka zhvillimin e tij në një regjion të Mitrovicës, ku do të jenë 18 pjesëmarrës nga të gjitha trevat shqiptare dhe diaspora, që do të vendosen në oborrin një familje skamnore, dhe do të jetojnë në kushte primitive për shtatë javë, ndërsa gjatë kësaj kohe do të ndërtojnë shtëpinë e asaj familje.
Në një prononcim për Telegrafin, moderatori i emisionit Gent Efendia ka zbuluar disa nga detajet këtij spektakli human:
“Është një sipërfaqe prej gjithsej 10 hektarë, nga ku 18 banorë, do të jetojnë në kushte primitive në kontenjerë, ndërsa gjatë periudhës shtatë javore do të ndërtojnë shtëpinë e familjes skamnore. Nesër (e mërkurë) do të futen nëntë banorët e parë nën shoqërimin e arkitektit dhe inspektorit, ndërsa më në javën në vazhdim do të vijnë tjerët. Orari i transmetimit është në orën 00:00 në RTK 1, ndërsa transmetim 24 orësh do ta ketë në kanalin RTK 3”, tha Efendia për Telegrafin.
Një e veçantë tjetër për këtë spektakël do të jetë influencimi i emrave të njohur nga fusha të ndryshme, të cilët do të vijnë herë pas here për vizitë në “Kooperativa”.
“Çdo javë do të ketë nga një të ftuar special VIP, i cili do të vizitojë banorët dhe do të ndjek punimet. Edhe emisionin do ta zhvillojmë në kushte primitive, pra nuk kemi skenografi, pasi duam që çdo gjë të dalë sa më reale lidhur me temën që ne prekim. Bashkë-moderator me mua besoj tani më e dini është Vesel Kurtishaj, fituesi i Big Brother Albania”, përfundoi për Telegrafin Gent Efendia, moderator i emisionit.
Befasia e publikut lidhur me këtë spektakël ‘shuhet’ nesër (e mërkurë) me fillimin e episodit të parë të “Kooperativa”. /Telegrafi/