David De Gea është pranë që t’u japë fund thashethemeve për të ardhmen e tij, duke nënshkruar kontratë të re me Manchester Unitedin, nga e cila do të përfitojë 375.000 funte (415.080 euro) në javë.
Portieri spanjoll është duke biseduar me klubin qe një vit në lidhje me kontratën e re, ndërkohë që për herë të fundit kishte rinovuar në vitin 2015 (pas dështimit për të kaluar te Real Madridi), kontratë katërvjeçare me opsionin për t’ia vazhduar edhe për një vit që është e drejtë e Djajve të Kuq.
De Gea ka kërkuar siguri në lidhje me të ardhmen e klubit dhe projektet e reja, ndërkohë që kishte refuzuar të nënshkruante gjatë kohës sa ishte trajner Jose Mourinho.
28-vjeçari ka kërkuar pagë të barabartë me Alexis Sanchez (lojtarin më të paguar te Unitedi), mirëpo sipas njoftimeve që i transmeton metro.co.uk, ai është pajtuar të jetë lojtari i dytë më i paguar.
Kontrata pesëvjeçare në vlerë totale prej 91 milionë funtesh (101 milionë euro) do ta bëjë De Gean portierin më të paguar në botë.
Spanjolli do ta nënshkruajë kontratën e re pas kthimit të Unitedit nga turneu parasezonal dhe do të jetë një shtytje e madhe për trajnerin Ole Gunnar Solskjaer, i cili gjithmonë ka dashur që ta mbajë portierin në skuadër. /Telegrafi/