Kryetari i Komunës së Prishtinës, Përparim Rama, është lavdëruar të martën për punën që po bëhet në terren sa i përket kontratave të nënshkruara me operatorë ekonomikë.
Përmes një postimi në Facebook, ai ka bërë të ditur se në gjashtëmujorin e parë të këtij viti kanë nënshkruar 231 kontrata me kompani të ndryshme për realizimin e projekteve, vlera e të cilave është 55 milionë euro.
“Një rritje prej 43 për qind i kontratave mesatare mujore, në krahasim me vitin e kaluar, që ishin 19 ndërsa këtë vit 33”, ka shkruar kryetari Rama.
I pari i kryeqytetit tutje ka thënë se gjatë gjithë vitit të kaluar janë nënshkruar 229 kontrata në vlerën e 35 milionë eurove.
“Këto shifra na tregojnë se jemi në rrugë të mbarë për shpenzimin e buxhetit më shumë se çdo vit tjetër më parë”, ka përfunduar ai. /Telegrafi/
