Zgjatja e kontratës që Zion Williamson e nënshkroi në fillim të verës parasheh që lojtari mund të humbasë shumë para nëse e tejkalon një peshë të caktuar.
Që nga fillimi i karrierës së tij në NBA, Williamson ka pasur shumë probleme me lëndimet dhe mbipeshën.
Në tre vjet, Williamson ka luajtur gjithsej 85 ndeshje shkaku i dëmtimeve.
Drejtuesit e New Orleans Pelicans u siguruan që në kontratën e re që zgjat deri në vitin 2028 të përfshinin disa klauzola, sipas të cilave ai do të fitojë 193 milionë dollarë të garantuara, por shuma mund të rritet deri në 231 milionë dollarë.
Megjithatë, sipas mediave, Williamson mund të humbasë para nëse tejkalon një peshë të caktuar trupore. Në veçanti, nëse lojtari 22-vjeçar kalon 134 kg, paga e tij do të reduktohet.
Edhe pse shuma nuk është specifikuar, padyshim që ky dënim duhet të jetë miliona dollar, pasi Williamson merr afër 33 milionë dollarë në vit duke filluar nga sezoni i ardhshëm.
Sezonin e kaluar, Bleacher Report raportoi se ai peshonte më shumë se 136 kg (disa burime përmendin edhe peshën 150 kg), por pas nënshkrimit të një kontrate të re, ai patjetër do të duhet të jetë më i kujdesshëm. /Telegrafi/