Ministria e Mbrojtjes së Republikës së Maqedonisë dhe Akademia Ushtarake dje (09 qershor 2016) e ka shpallur konkursin për regjistrimin e studentëve/kadetëve për nevojat e Ministrisë së Mbrojtjes dhe Armatës së Republikës së Maqedonisë si dhe për studentë në sferën e menaxhimit me kriza, mbrojtje dhe shpëtim në ciklin e parë të studimeve në Akademinë Ushtarake „Gjeneral Mihailo Apostollski“ – Shkup për vitin akademik 2016/2017, transmeton Telegrafi Maqedoni.
Në këtë konkurs të ciklit të parë të studimeve do të pranohen 30 kandidatë prej të cilëve 20 studentë/kadetë në studime për nevojat e Ministrisë së Mbrojtjes dhe Armatës së Republikës së Maqedonisë, ndërsa 10 kandidatë për në sferën e menaxhimit me kriza.
Studimet e ciklit të parë të studimeve do të organizohen sipas programeve studimore të akredituara me ligj, normativave, standardeve dhe metodologjive të pranuara nga hapësira e vetme Evropiane për arsim të lartë, të vlerësuara me kredi sipas EKTS-së. Programet studimore të ciklit të parë të studimeve në Akademi përmbajnë 240 kredi dhe zgjasin katër vite. Çdo vit në programin studimor përmban 60 kredi.
Të gjitha hollësitë lidhur me konkursin mund të gjenden në shpalljen për konkurs në gazetat ditore dhe në ueb faqen e Ministrisë së Mbrojtjes./Telegrafi/