Pas refuzimit të ofertës së Kurtit nga LDK-ja, ka reaguar nënkryetari i Lëvizjes Vetëvendosje, Glauk Konjufca.
Ai përmes një deklarate për media, ka thënë se refuzimi i LDK-së tregon se kush ka qenë i sinqertët gjatë gjithë përpjekjes për koalicion parazgjedhor.
“Vetëvendosje është e sigurt që ne po hynim në një garë dhe listë të përbashkët me LDK që do të ishte fitore para zgjedhjeve, mirëpo refuzimi i LDK tregon se kush ka qenë i sinqertë. Kemi bërë gjithçka që është e mundur si VV. Nuk e kemi vendosur si kryeministër Kurtin në mënyrë të njëanshme. Kemi heq dorë nga bartja e listës dhe ia kemi dhënë që Kryeministrin ta përcaktojë populli”, ka deklaruar Konjufca.
Sipas tij, oferta e tyre reflekton një zemërgjerësi të Vetëvendosjes, dhe se përgjegjësinë për moskrijimin e koalicionit në mes dy partive do ta bartë LDK-ja.
“Mundësinë e PAN-it të ardhshëm LDK do ta eliminonte me koalicionin me VV dhe kryeministrin do ta vendoste populli. LDK e mban përgjegjësinë çfarëdo që të ndodhë në skenën politike. Kurti me ofertën që ia bëri LDK-së ka shkuar edhe kundër vullnetit të shumë aktivistëve tanë. Ne kemi qenë të bindur se LDK do ta pranonte këtë mundësi, sepse meqenëse kishim pozicione të cilat e barikaduan postin e kryeministrit, ne e dërguam te populli”, ka thënë ai.
Konjufca ka shtuar se letra e Mustafës ishte mbyllje e derës për Vetëvendosjen.
“Kemi bërë gjithçka sepse ua kemi pasë borxh qytetarëve. Ata nuk po na e pranojnë kandidatin tonë që ka shumë më shumë vota se Vjosa. Albin Kurti kishte 143 mijë vota kurse Vjosa 64 mijë vota. Edhe përkundër kësaj, thamë hajde këtë çështje le ta zgjidhin qytetarët”, është shprehur ai.
Më tej ka theksuar se oferta e LDK-së për kryeministre Vjosa Osmanin nuk do të pranohet nga Vetëvendosje./Telegrafi/