Kryetari i Kuvendit të Kosovës, Glauk Konjufca, ka thënë se sot Serbia ka dënuar me gjashtë vite burgim qytetarin Nezir Mehmetaj.
Konjufca derisa ka dënuar fuqishëm këtë padrejtësi, ka kërkuar nga bashkësia ndërkombëtare të rrisë presionin ndaj Serbisë, transmeton Telegrafi.
“Sot, pas një arrestimi në vitin 2020, pas një akuzimi dhe procesi të shpikur e arbitrar ndaj qytetarit tonë Nezir Mehmetaj, gjykata në Serbi e ka dënuar atë me 6 vite burg. Mendësia e vjetër e Serbisë që ka kryer gjenocid në Kosovë nuk mund të prodhojë asgjë të re veçse fshehjes së krimeve në njërën anë dhe shpikjes së tyre në anën tjetër”, tha ai.
Tutje, ai ka shtuar “e dënoj fuqishëm këtë padrejtësi dhe kërkoj nga bashkësia ndërkombëtare të rrisë presionin ndaj Serbisë, me zë të qartë kundër kësaj padrejtësie dhe në mbështetje të të drejtave të njeriut”.
Ndryshe, shtetasi i Kosovës, Nezir Mehmetaj është dënuar nga autoritetet gjyqësore serbe me gjashtë vjet burgim, nën akuza për krime lufte.
Ai u arrestua më 3 janar 2020 në pikëkalimin kufitar në Merdarë dhe që atëherë është mbajtur në paraburgim./Telegrafi/
