Vendimi i ministrit të Punëve të Jashtme të Kosovës, Glauk Konjufca, që të shkarkohen 14 konsuj kosovarë të cilët ishin në ambasadat e Kosovës në botë, ka bërë që konsujt të reagojnë ashpër ndaj ministrit.
Ndaj vendimit të Konjufcës ka reaguar edhe Henor Pakashtica, Konsull në Ambasadën e Republikës së Kosovës në Sofje të Bullgarisë, transmeton Telegrafi.
Ai ka thënë se asnjëherë nuk ka menduar që emërimi i tij ishte i kundërligjshëm.
“Më 21 Mars 2019 ishte data kur unë dorëzova dokumentet për pozitën Zyrtar të Misionit Diplomatik , kërkesa ime ishte No 9 . Unë i jam nënshtruar atij konkursi ku, pas fazës së parë të seleksionimit të bazuar në dokumentacion, ka pasur edhe tri faza të tjera të testimit dhe vlerësimit. Këto vlerësime janë organizuar dhe realizuar nga organet kompetente të shtetit të Kosovës. Për shembull, faza e dytë e testimit me shkrim është organizuar dhe monitoruar nga autoritetet e Forcës së Sigurisë së Kosovës në qendrën e tyre kryesore në Prishtinë, në Maj të vitit 2019”, ka shkruar Pakashtica në Facebook, transmeton Telegrafi.
Gjithashtu, ai ka thënë se për shkak të angazhimit të tij në MPJ, ishte larguar nga vendi i punës ku kishte filluar të punonte pa mbushur 18-vjeç.
“Pas kalimit me sukses të secilës fazë, zyra e personelit të MPJ-së, më ka ftuar për të ju nënshtruar fazës së fundit të vlerësimit – intervistës finale. Kjo intervistë është realizuar me 05.06.2019 në ora 14:30 në objektet e Ministrisë së Punëve të Jashtme. Vlen të theksohet se Ministri i atëhershëm i Punëve të Jashtme, Behgjet Pacolli, emërimin tim, ndër tjerash e ka bërë duke ju referuar konkursit të lartpërmendur.
Reagon njëri nga 14 konsujt e shkarkuar, akuzon Konjufcën për shkelje të ligjit
E fundit por jo më pak e rëndësishme, dua të bëj të ditur se për shkak të angazhimit tim në Ministrinë e Punëve të Jashtme, në verë të vitit të kaluar unë kam dhënë dorëheqje nga vendi i punës ku kam filluar të punoj ende pa mbushur moshën 18 vjeçare Ambasada e Republikës së Bullgarisë në Prishtinë”, vijon shkrimi i tij.
Ndryshe, ministri Konjufca ka deklaruar se ka marrë vendim për shfuqizimin e vendimeve të kundërligjshme, në kundërshtim me nenin 20 të Ligjit Nr. 03/L-122 për Shërbimin e Jashtëm të Republikës së Kosovës.
Konjufca ka theksuar se ky vendim për shfuqizimin e vendimeve të kundërligjshme atakon 14 konsuj në disa Ambasada të Republikës së Kosovës në botë./Telegrafi/
