Gazetari Ilir Ikonomi sjell një foto të Faik Konicës me sekretarin amerikan të Shtetit Frank Kellogg. Takimi ishte mbajtur më 17 korrik 1926, kur Konica filloi detyrën e ministrit fuqiplotë të Shqipërisë në Washington. Fotoja është realizuar në Departamentin e Shtetit.
Pas takimit, Konica i dërgoi këtë telegram Ministrisë së Jashtme në Tiranë: “Sot u poqa zyrtarisht me sekretarin e shtetit, domethënë Ministrin e P. Jashtme hon. F. B. Kellogg i cili më bëri një pritje kordiale. Qëndruam bashkë dhe për një fotografi. Presidenti Coolidge ndodhet larg me vakancë dhe kthehet në Washington pas pesë javësh…”
Kellogg, i cili kishte një prestigj të shkëlqyer në jetën politike amerikane, do të merrte tre vjet më vonë çmimin Nobel të Paqes.
“U gëzova kur e gjeta fotografinë e rrallë që përmend Konica, sepse ajo shënon pritjen e parë që i bëhej një ambasadori shqiptar nga titullari i Departamentit të Shtetit. Pas disa javësh Konica u prit në Dhomën Blu të Shtëpisë së Bardhë nga Presidenti Calvin Coolidge, për të paraqitur letrat kredenciale”, shkruan Ikonomi. “Kështu filloi historia e përfaqësimit diplomatik të Shqipërisë në SHBA. Me pushtimin e Shqipërisë nga Italia fashiste më 7 prill 1939, Roma mori nën kontroll punët e jashtme shqiptare. SHBA u detyruan ta mbyllin legatën në Tiranë dhe të urdhëronin tërheqjen e përfaqësuesit të tyre diplomatik, Hugh Grant. Megjithatë, Departamenti amerikan i Shtetit vazhdoi ta njohë Konicën si përfaqësues të Shqipërisë në Uashington”. /Telegrafi/
