Asnjëra nga 8 komunat e përfshira në analizën “Për transparencë të vetëqeverisjes lokale” nuk kanë shpallur në ueb-faqet e tyre se çfarë propozim – buxheti kanë, kurse vetëm gjysma e komunave kanë informacione të tilla rreth buxheteve të miratuara. Vetëm njëra nga këto komuna ka shpallur planin për porosi publike, ndërsa vetëm gjysma e tyre shpallin raporte për realizimin e këtyre porosive. Ekspertja për përkrahje institucionale, Jadranka Kungullovska, para disa ditëve vlerësoi se transparenca e komunave në Maqedoni është në nivel të ulët. Sipas saj, shumë pak detaje jepen mbi punën e vetëqeverisjes lokale në ueb-faqet e tyre dhe kjo paraqet papërgjegjësi ndaj tatimpaguesve.
“Të gjitha komunat kanë ueb-faqe, nga aty mund të shihet puna e një komune, kjo nuk është kështu vetëm tek ne, kjo është një trend botëror. Nëse i hapni ueb-faqet e komunave ju do të habiteni se si ato kopjohen nga njëra tjetra, d.m.th aty janë vendosur ligje dhe informata të panevojshme”, u shpreh Jadranka Kungullovska, eksperte për përkrahje institucionale.
Ministrja për vetëqeverisje lokale, Shirete Elezi, theksoi se shpallja e informatave të detajuara nga administrata komunale është shumë e nevojshme, jo vetëm për qytetarët, por edhe për komunitetin e biznesit.
“Përkrahim një projekt shumë të rëndësishëm “Qytetari para se gjithash”, me qëllim zbatimin e standardeve për transparencë në nivel lokal. Qëllimi është administrata lokale të transformohet, kurse informacionet të jenë të lira për qytetarët. Sa më mirë dhe më qartë të shpallen informatat aq më mirë është për qytetarët dhe biznes komunitetin”, tha Shiret Elezi, Ministre e vetëqeverisjes lokale.
Ambasadori i Britanisë së Madhe në Maqedoni, Charles Garrett theksoi se nëse opinioni ka informacionet e duhura, deri tek të cilat lirshëm mund të vijë, ata do të jenë në mundësi që të marrin vendime më të mira në bazë të informacioneve që posedojnë, për atë se kë duhet të votojnë në zgjedhje.
“Тransparenca është e rëndësishme për çdo shoqëri dhe demokraci të shëndetshme sepse nëse inistutucionet publike janë transparente, atëherë do të merren vendime më të mira, sepse do ta dinë se dikush i sheh dhe i përcjell, dhe e dijnë që njerëzit i kuptojnë arsyet për vendimet e tyre. Nëse opinioni ka informata lirisht të qasshme atëherë ata janë në mundësi që të marrin më shumë informata se kë do të votojnë në zgjedhje. Dhe në një periudhë parazgjedhore kjo është veçanërisht e rëndësishme”, tha Charles Garrett, Ambasador i Britanisë së Madhe në Maqedoni.
Ndryshe në Britaninë e Madhe, komunat rregullisht dërgojnë broshura me të dhëna deri tek qytetarët se si shpenzohen paratë nga buxheti i komunave. Varësisht nga origjina e popullatës broshurat shpallen në disa gjuhë të huaja. Të dhënat nga transparenca e vetëqeverisjes lokale sot u shpallën në analizën “E-transparenca” në kuadër të projektit “Qytetari në vend të parë” i organizuar nga institucionet qeveritare kurse financohet nga Unioni Evropian dhe Ambasada e Britanisë së Madhe në Shkup.
