Komuna e Prishtinës, nëpërmjet një komunikate është ankuar se sot gjatë një aktiviteti të ndërmarrë nga Komuna e Prishtinës për pastrimin e deponive ilegale, është penguar nga drejtori i Deponisë së Mbeturinave në Mirash, Abdullah Haxhiu – vëllai i deputetit të PDK-së, Bekim Haxhiu.
Sipas Komunës së Prishtinës, Haxhiu ka refuzuar që të lejojë maunet me mbeturina të zbrazen aty, duke kërkuar targat e maunave si dhe pagesë për zbrazjen e mbeturinave në deponi. Kjo ndërhyrje e tij, cilësohet si veprim me motive politike.
Si rezultat i kësaj pengese Komuna e Prishtinës thotë se nuk arriti që të përmbush planin e paraparë për pastrimin e të gjitha deponive ilegale.
“Ne e dënojmë një sjellje të tillë të Drejtorit të Deponisë së Mbeturinave në Mirash dhe konsiderojmë se kjo pengesë nga ana e tij është bërë me motive politike, duke e marrë parasysh se ai është vëllai i deputetit të PDK-së, Bekim Haxhiut. Është për keqardhje se si individë të caktuar janë të gatshëm ta dëmtojnë interesin e qytetarëve vetëm për përfitime politike. Komuna e Prishtinës do të vazhdojë të punojë me përkushtim të plotë që Prishtina të bëhet ashtu si i ka hije kryeqytetit”, thuhet në fund të kumtesës.