Kryetari i Komunës së Prishtinës, Shpend Ahmeti ka njoftuar se Kuvendi i Komunës në mbledhjen e sotme ka miratuar vendimi për themelimin e fondit për grante të bizneseve të vogla dhe të mesme në vlerë prej 5 milionë euro, si ndihmë për humbjet e pasuara nga pandemia COVID-19.
Ahmeti, përmes një postimi në facebook, ka thënë se aplikimi do të bëhet online dhe bizneset duhet të dëshmojnë humbjet nga COVID-19.
Postimi i plotë i Ahmetit:
“Sot në Kuvendin Komunal të Prishtinës u aprovua propozimi jonë për themelimin e fondit për grante për bizneset e vogla dhe të mesme në vlerë prej 5 milion Eurove. Aplikimi do të bëhet online dhe bizneset duhet të dëshmojnë humbjet nga covid19. Procedura do të jetë sa më e thjeshtë dhe transparente. Për të gjithe detajet do të njoftoheni me kohë.
Falemnderit asambleistëve për voten për! #prishtina”, ka shkruar Ahmeti. /Telegrafi/
