Kryetari i Komunës së Gostivarit, Arben Taravari ka marrë vendim në të cilën asnjë i punësuar në administratën komunale të mos shfrytëzojë telefon celular zyrtar.
Një vendim i tillë vjen për të kursyer nga buxheti i Komunës, njofton Telegrafi Maqedoni.
“Asnjë i punësuar i Komunës së Gostivarit, prej fillimit të muajit gusht 2019, nuk do të shfrytëzojnë më celular zyrtar”, shkruan Tarvari në rrjetin social në ‘Facebook’.
Sipas sekretarit të Komunës së Gostivarit, Nazmi Jusufi, marrëveshja me operatorin e deritashëm nuk do të vazhdohet dhe nuk do të ketë marrëveshje të re.
“Numrat që duhej të përfshihen në marrëveshje, në të ardhmen do të jenë numra privat dhe personat që deri tani përdornin do të paguajnë vet. Ky veprim vjen në kuadër të fushatës për kursime dhe uljen e shpenzimeve. Deri tani për shpenzimet për shërbime telefonike, komuna shpenzonte mbi 100.000 denarë në muaj. Nga ky muaj të gjithë të punësuarit vet do të paguajnë faturat”, tha për AIM, sekretari i Komunës së Gostivarit, Jusufi.
Me këtë vendim komuna pritet të kursejë 20.000 euro./Telegrafi/
