Protestat e Këshillit të Prindërve dhe nxënësve të shkollës “Daut Bogujevci”, si shenjë pakënaqësie me vendimin e Komunës së Fushë Kosovës, që objekti i ri i shkollës t’i ofrohet shkollës “Mihail Grameno”, janë të arsyeshme dhe të përkohshme.
Kështu kanë theksuar nga Komuna e Fushë Kosovës.
Drejtori i Drejtorisë për Arsim, Islam Shabani ka thënë për Telegrafin se kanë qenë të detyruar ta marrim një vendim të tillë.
Sipas tij, shkolla “Mihail Grameno”, ka numër të madh të nxënësve dhe ka punuar në tri ndërrime, e kjo e ka vështirësuar sipas tij, shumë punën e këtij institucioni.
“Ne u kemi thënë të presin pak, sepse shumë shpejt do ta bëjmë një zgjidhje. Vetëm sivjet, e pastaj do ta kalojmë këtë problematikë. Nuk duam të ua marrim shkollën, por vetëm ta shfrytëzojmë”, ka shtuar Shabani.
Sipas tij, ka hapësirë të mjaftueshme për nxënësit e shkollës “Daut Bogujevci” në objektin e vjetër.
“Mirëpo, kërkesa e tyre që në objektin e vjetër të “Daut Bogujevcit” të vendosen nxënësit e shkollës “Mihail Grameno”, është e pamundshme, sepse nuk ka hapësirë. Vetëm pak mirëkuptim po kërkojmë”, ka shtuar Shabani.
Ndryshe, protestat e prindërve dhe nxënësve të kësaj shkolle është duke vazhduar edhe të hënën, e të cilat vijnë si shenjë pakënaqësie me vendimin e Komunës së Fushë Kosovës, që objekti i ri i shkollës, i destinuar për nxënësit e shkollës “Daut Bogujevci”, t’i ofrohet SH.M.M.U “Mihail Grameno” për nxënësit e saj. Procesi mësimor është bojkotuar të hënën. /Telegrafi/