Kompania “Tiks.app”, që është e autorizuar për shitjen e biletave të ndeshjes Kosovë – Angli, është ankuar në sulme kibernetike për dështimin e sotëm që të shesë biletat për ndeshjen e së dielës.
Ka pasur shumë ankesa nga qytetarët që nuk kanë mundur të blejnë bileta, ndërsa kjo platformë përmes një njoftimi të ri ka thënë se po punon për të riaktivizuar shërbimin.
Sipas tyre një pjesë e biletave janë shitur, ndërsa një pjesë do të kthehet në treg së shpejti.
“Ne si platformë kemi qenë cak i disa sulmeve me ç’rast shërbimi ka qenë shumë i limituar. Ne jemi munduar që shërbimin ta mbajmë aktiv gjatë kësaj, mirëpo kjo gjë nuk ishte e mundur. Disa prej përdoruesve kanë arritur të sigurojnë bileta, ndërsa për përdoruesit e tjerë jemi duke punuar në vazhdimësi për të riaktivizuar shërbimin”.
“Ndjejmë keqardhje për situatën e cila është krijuar dhe shpresojmë të kemi mirëkuptimin e juaj në këtë rast. Shpresojmë që këto akte keqdashëse të ndalen sa më shpejtë dhe shërbimi i shitjes së biletave të vazhdojë shumë shpejtë”, thuhet në njoftimin e kësaj platforme.
Ndërkohë, shitja e biletave në tregun e zi tashmë ka filluar. /Telegrafi/