Se Esteban Granero është një futbollist unik dhe kjo është sqaruar edhe një herë, për faktin se ai ka investuar para për të krijuar një kompani që merret me Inteligjencë Artificiale (AI).
Ish-lojtari i Real Madridit, aktualisht ka zhvendosur fokusin nga “shkenca e sporteve”, në luftën për t’i dhënë fund pandemisë së coronavirusit.
Granero që luajti në Espanyol deri në fillim të këtij sezoni, para se të transferohej në Marbella, ka krijuar këtë kompani, që aktualisht po merret me analiza rreth numrave për coronavirusin.
Duke folur me MARCA, mesfushori shpjegoi saktësisht se çfarë po bën kompania e tij – e quajtur Olocip.
“Ne kemi një problem që është aq serioz në shoqërinë tonë (coronavirusi), dhe së bashku me fushatën #StopCorona dhe Samaipata, kemi bërë bashkë forcat tona dhe kemi dalë me modele parashikuese, që mund të parashikojnë sjelljen e kësaj epidemie”.
“Në këtë mënyrë, do të jetë e mundur të merren vendime para kohe në drejtim të lëvizjes së njerëzve, duke e ditur sigurt se kur mund të hiqen masat e bllokimit dhe të përgatitemi më mirë për pandemitë e ardhshme”.
“Ne kemi ardhur me modele të ndryshme në kohë rekord dhe ato janë në dispozicion për këdo që dëshiron t’i përdorë ato”, ka treguar futbollisti.
Ander Alcon, shkencëtari kryesor i të dhënave në Olocip, ka thënë se numri i personave të infektuar në Spanjë përfundimisht mund të arrijë në 700 mijë, por ai beson se kulmi tashmë është arritur.
“Sipas modelit tonë parashikues, kulmi në Spanjë ishte me 2 prill të këtij muaji. Pra, ne kemi kaluar pikën më vendimtare. Parashikimet mund të ndryshojnë në varësi të masave të marra nga qeveria, kështu që ne nuk mund të garantojmë se në cilën datë do të përfundojë periudha e karantinës, por duke folur statistikisht, ne mund të themi se për t’i dhënë fund karantinës, duhet deri në fund të këtij muaji”, ka thënë ai. /Telegrafi/