Investimi prej 1 miliard funta (1.32 miliardë dollarë) nga kompania British Petroleum (BP) do të rrisë flotën e saj elektrike dhe pikat e karikimit të shpejtë në Britani të Madhe, njoftoi sot kompania.
BP do të investojë në infrastrukturën e karikimit të automjeteve elektrike (EV) të vendit për një periudhë 10-vjeçare.
Financimi do të përdoret për të ofruar karikues më të shpejtë dhe ultra të shpejtë në lokacione kyçe, për të zgjeruar produktet dhe shërbimet e flotës dhe për të lançuar produkte dhe shërbime të reja dixhitale të karikimit shtëpiak për të përmirësuar shërbimet e klientëve, theksoi kompania.
Për më tepër, investimi në industrinë e karikimit do të krijojë qindra vende të reja pune në vend, transmeton Anadolu Agency.
“Investimet do të ndihmojnë në përmbushjen e kërkesës me rritje të shpejtë të Britanisë për karikimin e automjeteve elektrike dhe do të mbështesë tranzicionin e vendit drejt transportit me karbon të ulët për konsumatorët dhe automjetet”, tha BP.
Me investimin e ri, BP do të trefishojë afërsisht numrin e pikave publike të karikimit në rrjetin e saj në Britani.
Kompania planifikon të përshpejtojë hapjen e pikave të karikimit ultra të shpejtë, të cilat do të jenë në gjendje t’u ofrojnë drejtuesve të automjeteve elektrike deri në 100 milje distancë në rreth 10 minuta karikim.