Komisioni për sëmundje ngjitëse sot do të mbajë takim me kryetarët e komunave të Shkupit, informojnë për MIA-n nga Ministria e Shëndetësisë.
Pritet që në takim të diskutohet për mundësinë që pushtetet lokale të përfshihen në ballafaqimin me koronavirusin.
“Patjetër në çdo nivel të forcohet vetëdija për parandalimin e koronavirusit”, ka njoftuar në profilin e tij në FB, ministri i Shëndetësisë, Venko Filipçe.
Më shumë se 40 klasterë të mëdha me koronavirus janë regjistruar në territorin e mbarë shtetit, ndërsa sipas kompetentëve, ai është rezultat i mosrespektimit të masave për mbrojtje personale, distancë dhe shmangie të grupimeve dhe tubimeve.
Sipas të dhënave të djeshme të ISHP-së në shtet janë konfirmuar 101 raste të reja me Kovid-19, ndërsa gjithsej të diagnostikuar janë 5.106. Më shumë të infektuar janë diagnostikuar në Shkup- 2.498 ku numri më i madh 384 në komunën e Çairit. Numri i rasteve aktive në qytet arrin 1.699.