Udhëheqësi suprem iranian u ka bërë thirrje kombeve myslimane që të “lidhin rripin e mbrojtjes” nga Afganistani në Jemen dhe nga Irani në Gaza dhe Liban.
Ayatollah Ali Khamenei foli teksa drejtonte lutjet e së Premtes në Iran për herë të parë në katër vjet, shkruajnë mediat e huaja, përcjell Telegrafi.
Ai shtoi se sulmi i 7 tetorit nga Hamasi ndaj Izraelit – gjatë të cilit Izraeli thotë se rreth 1200 njerëz u vranë dhe 250 u morën në Gaza si pengje – ishte një akt legjitim, siç ishte sulmi i Iranit ndaj vendit këtë javë.
Irani nuk do të “zvarritë apo nxitojë të kryejë detyrën e tij” në përballjen me Izraelin, shtoi ai, duke e përshkruar “veprimin e shkëlqyer” të sulmit raketor këtë javë kundër Izraelit si “plotësisht të ligjshëm dhe legjitim”.
Deklaratat e tij vijnë më pak se një javë pasi Hassan Nasrallah – lideri i grupit militant libanez Hezbollah të mbështetur nga Irani – u vra në një sulm ajror izraelit.
Mediat theksojnë se fjalimi i tij është një “thirrje drejtuar botës muslimane për t’u bashkuar” kundër asaj që udhëheqësi suprem e sheh si agresorin kryesor, Izraelin. /Telegrafi/