Mërgimtarët të cilët kanë përfunduar pushimet në Kosovë, tashmë janë nisur drejt vendeve ku jetojnë, e kjo ka bërë që të krijohen kolona të gjata në vendkalimet kufitare.
Kolona më të gjata janë krijuar në pikat kufitare të cilat bëjnë lidhjen mes Kosovës dhe Serbisë. Në Merdare, kolonat arrijnë deri në 1 mijë e 100 metra, ku për të dalë nga Kosova përmes kësaj pike duhet pritur tri orë, shkruan Telegrafi.
Gjithashtu tek Dheu i Bardhë kolonat arrijnë deri në 600 metra, ndërkaq bashkatdhetarët duhet pritur një orë për të dalë nga Kosova përmes kësaj pike. Gjendja është e njëjtë edhe në Jarinje.
Kurse, sipas të dhënave të fundit të publikuar në ora 09:50 nga Qendra Kombëtare për Menaxhim Kufitar, vendkalimet tjera janë të lira për qarkullim, hyrja dhe dalja mund të bëhet nga tre deri në pesë minuta.
Po ashtu, kjo qendër njofton shoferët se të gjitha rrugët që shpijnë në vendkalimet kufitare janë të lira, dhe se në to nuk ka dëborë, mjegull, rrëshqitje dheu dhe akull.
Qytetarët mund të përcjellin në kohë reale gjendjen në vendkalimet kufitare, duke klikuar KËTU./Telegrafi/
