Këshilli për Mbrojtjen e të Drejtave e të Lirive të Njeriut (KMDLNJ), vlerëson se shtrenjtimi i rrymës përkeqëson edhe më shumë gjendjen ekonomike të qytetarëve.
KMDLNJ njofton se ditëve të fundit i janë drejtuar shumë qytetarë shkaku se faturat për muajin e fundit janë më të larta 100% e në disa raste edhe më shumë krahasuar me muajin paraprak.
“Qeveria e Kosovës , me përshkallëzimin e TVSH-së pati premtuar se qytetarët e Kosovës do të paguajnë më pak para për rrymën e shpenzuar në ndërkohë që KED-si me këto fatura pamëshirshëm e ka goditur konsumatorin dhe e ka përgënjeshtruar qeverinë e Kosovës. Nuk është hera e parë që vërtetohet se KEDS plaçkit botërisht qytetarët e Kosovës”, thuhet në reagim e kësaj organizate.
Sipas tyre pas shtrenjtimit të rrymës pashmangshëm do të ketë shprehje të pakënaqësisë të qytetarëve. Po ashtu thotë se do të përkrahë çdo protestë të natyrës sociale e cila është e pandikuar nga politika dhe e cila është në mbrojtje të interesit të qytetarit.
“Qytetarët e Kosovës duhet t’i kundërshtojnë këto fatura të fryra sikur edhe shtrenjtimin e rrymës duke mos i përjashtuar protestat e natyrës sociale deri te mospagimi i faturave kontestuese. Është jonormale që faturat të rriten mbi 100% kur edhe muaji paraprak llogaritej me tarifa dimërore”, theksohet në reagimin e KMDLNj-së. /Telegrafi/