Sulmuesi legjendar i Ajaxit dhe Barcelonës, Patrick Kluivert është bërë trajner i skuadrës turke Adana Demirspor.
Kjo do të jetë puna e parë e holandezit si trajner në futbollin e klubeve, pasi ka punuar si asistent në disa klube.
Gjatë marrjes së detyrës te Adana, ai pati një bisedë për mediat turke, ku ka folur për tema të ndryshme aktuale të futbollit, ndaj ka veçuar lojtarët që sipas tij do të jenë liderët e gjeneratës së re të yjeve.
“Për momentin, Erling Haaland, Kylian Mbappe dhe Vinicius Junior sundojnë futbollin evropian dhe jam i sigurt se të paktën njëri prej tyre do ta fitojë “Topin e Artë”. Ata tre lojtarë janë liderët e gjeneratës së re, por së shpejti do tu bashkohet edhe Jamal Musiala”, ka thënë Kluivert në një intervistë për JohnnyBet.
Kluivert nuk është i vetmi që është i kënaqur me xhevahirin 20-vjeçar të Bayern Munich dhe kombëtares gjermane, Jamal Musial.
I riu kishte një sezon fenomenal ku shënoi 16 gola. Ai shënoi më të rëndësishmin në xhiron e fundit të Bundesligës kundër Koln, duke thyer zemrat e tifozëve të Borussia Dortmund dhe duke i sjellë Bayernit një titull të ri.
Pas vetëm tre sezonesh, ai tashmë është lojtari më i mirë i top skuadrës dhe Transfermarkt e vlerëson me 110 milionë euro. /Telegrafi/
