Klubet nga Superliga e Shqipërisë, të cilat do të marrin pjesë në garat evropiane kanë mësuar sot (e mërkurë) kundërshtarët e tyre nëse arrijnë në raundet e dyta të Ligës së Kampionëve apo Ligës së Konferencës.
Në Nyon të Zvicrës u hodh sot shorti për raundin e dytë të Ligës së Kampionëve, ku kampioni i Superiores, Partizani, nëse arrin të kalojë Bate Borisov, rivalët e tyre do të jenë kampionët e Qipros, Aris Limanssol.
Gjithashtu edhe Partizani nëse eliminohet në raundin e parë të Ligës së Kampionëve, bie në raundin e dytë të Ligës së Konferencës, ku do të përballej me fituesin e ndeshjes mes Atletic Club D’Escaldes-FK Buducnost Podgorica.
Përveç Partizanit, nga klubet e Superligës Shqiptare, kundërshtarët e mundshëm në raundet e dyta i mësuan edhe Tirana, Egnatia dhe Vllaznia, të cilat marrin pjesë në Ligën e Konferencës.
Kryeqytetasit e Tiranës ishin të pafat, duke u tërheq në një “short ferri”, pasi nëse kalojnë Dinamo Batum në raundin e parë, atëherë do të ndeshjen me gjigantin turk, Besiktasin.
Në anën tjetër, Egnatia, e cila do të ndeshet në raundin e parë me armenët e Ararat Armenia, në raundin e dytë nëse kalon, si kundërshtar do ta ketë Aris Thessaloniki.
Skuadra e fundit nga Shqipëria, Vllaznia, e cila do të ndeshet në raundin e parë me Linfieldin e Irlandës së Veriut, si kundërshtar në raundin e dytë do të ketë ekipin polak, MKS Pogon Szczecin. /Telegrafi/
