Klubet e natës dhe diskotekat në Malin e Zi janë ndaluar të punojnë nga sot deri në 2 gusht, në përputhje me masat e reja për të luftuar pandeminë e coronavirusit.
Sipas mediave të huaja, përcjell Telegrafi, ndalimi zbatohet për funksionimin e klubeve të natës dhe diskotekave, si në ambientet e mbyllura, po ashtu edhe jashtë tyre.
Masat e reja ndalojnë gjithashtu ahengjet dhe festivalet muzikore, si dhe çdo mbledhje masive brenda.
Drejtori i Institutit të Shëndetit Publik në Podgoricë, Igor Galic, tha se klubet e natës dhe diskotekat pritet të fillojnë përsëri punën më 2 gusht, nëse situata epidemiologjike është e favorshme, por vetëm për ata që janë vaksinuar plotësisht ose kanë marrë dozën e parë të vaksinës për COVID-19 ose posedojnë një test negativ PCR si provë se ata i kanë mbijetuar coronavirusit, ose se kanë kaluar më pak se 180 ditë që nga testi pozitiv i PCR.
Sipas tij, në asnjërën nga këto raste nuk pranohet një test i shpejtë antigjen negativ ose një test antitrupi.
“Ne kërkojmë respekt të vazhdueshëm për këtë masë. Muzika e gjallë mund të interpretohet në kopshtet e tarracave dhe bareve në ajër të hapur deri në mesnatë, me respekt të qëndrueshëm për të gjitha masat e tjera epidemiologjike”, ka thënë Galic në një konferencë shtypi.
Ai shtoi se, nëse vazhdon trendi i mos respektimit të afateve dhe performimit të muzikës live brenda ambienteve hotelierike, dënimi do të ndryshohet në një pezullim total dhe ndalim të interpretimit dhe transmetimit të muzikës.
Galiç tha se situata epidemiologjike në Mal të Zi është ende e favorshme, gjë që u deklarua edhe nga Organizata Botërore e Shëndetësisë, por që ai bën thirrje për kujdes.
“Sipas njoftimeve dhe paralajmërimeve, Këshilli për Luftën kundër Coronavirusit reagoi menjëherë, pas sinjaleve të para, kështu që për shkak të ndryshimit të situatës epidemiologjike në Malin e Zi, masat u rregulluan sipas situatës në terren”, ka shpjeguar Galic.
Galiç përsëri u bëri thirrje qytetarëve që të vaksinohen në mënyrë që t’i sigurojnë vetes imunitet.
“Përveç shmangies së formave më të rënda të sëmundjes, ne presim që ata që janë vaksinuar në periudhën e ardhshme të kenë një avantazh”, shtoi Galic. /Telegrafi/