Ditë më parë, Klea Huta dhe Elgit Doda festuan ditëlindjen e parë të djalit të tyre, Krid.
Përveç momenteve jashtëzakonisht të bukura që sjell lajmi për ardhjen e frytit të dashurisë në jetë, shpesh gratë përjetojnë depresion, në periudhën e shtatzënisë apo pas lindjes.
I njëjti rast ndodhi edhe me Klean. Në një intervistë për emisionin “Rudina”, aktorja dhe moderatorja foli më shumë rreth mëmësisë dhe periudhës së shtatzënisë.
“Në fakt, të jem e sinqertë tre muajt e parë të shtatzënisë kam kaluar një depresion shumë të thellë. Dy muajt e parë, pasi unë një muajsh e morra vesh se isha shtatzënë. Kridi ka ardhur me dëshirë e të dyve ne, por mbase nga ndryshimi i hormoneve të trupit, trupi po pësonte një ndryshim shumë të madh, po krijonte hapësirë për një qenie tjetër, domethënë një realitet tjetër që unë nuk kisha përballë kurrë më parë. Edhe pse e doja dhe ishe me dëshirë ardhja e Krid, prapë ndodhi kjo pjesa e depresionit që nuk e shpjegoj dot sot e kësaj dite”.
Huta vazhdon tutje duke thënë: “Unë hoqa dorë nga shumë gjëra, mendoja këtë pjesën që më iku karriera, nuk do kem kohë për asnjë gjë, domethënë të gjitha gjërat e errëta më vinin në kokën time në atë periudhë, nuk doja të shikoja asnjë, nuk doja të rrija me askënd, çdo gjë më dukej sikur nuk jam gati, thosha çfarë bëra?”.
Tutje, Klea inkurajoi të gjitha nënat të kërkojnë ndihmë, duke theksuar se kjo periudhë do të kaloj dhe çdo gjë kthehet në normalitet.
“Mendime që kur i mendoj sot edhe them për të gjitha nënat, që nuk jeni vetëm, edhe mua më ka ndodhur kjo gjë, më ka shkuar mendimi shumë thellë që nuk po i them dot të gjitha, por e kalova me ndihmën e të afërmve të mi. Po u them kërkoni ndihmë, patjetër mund të kërkoni ndihmën edhe të psikologut, nuk është fare turp. Në momentin që ti e ndjen që veten nuk po e ndihmon, patjetër që të tjerë rreth vetes mund të të ndihmojnë”.
“Deri në muajin e tretë kalon çdo gjë, do të kaloni periudhën më të bukur të jetës. Unë doja gjithë jetën të isha shtatzënë, aq shumë e kam shijuar atë periudhë”, përfundoi Klea. /Telegrafi/
