Në seancën e Kuvendit të Kosovës ka pasur reagime edhe për ndalesën e flamurit të Kosovës në Festivalin Evropian të Këngës – Eurovision.
Kjo ka ndodhur me një rregullore të këtij manifestimi të organizuar nga Unioni i Transmetuesve Evropianë (EBU).
Deputetja e LDK-së, Alma Lama, i ka bërë thirrje Kuvendit që të reagojë për këtë shkelje.
“Klasifikimi i flamurit të shtetit të Kosovës në njërën anë me flamurin e një vendi terrorist, është fyerje e ndjenjave të milionave shqiptarëve kudo në botë”.
“Do të duhej të ishte fyerje e ndjenjave të të gjithë evropianëve. Unë mendoj se kjo tejkalon përmasa të një gafe politike, kjo tashmë është një çështje që duhet të ngrihet para gjykatave kompetente evropiane dhe duke qenë që qytetarët e Kosovës nuk kanë të drejtë të padisin në Gjykatën Evropiane për të drejtat e njeriut”.
“Unë nga foltorja e Kuvendit do t’u bëj thirrje shtetasve shqiptarë që kanë shtetësi të vendeve tjera që të bëjnë një padi të tillë”, ka thënë ajo.