Flet me dëgjuesit gjithandej kah arrijnë valët e “Radio Dukagjinit”.
Të gjithë e njohin zërin e saj, madje ia dinë edhe emrin, por nuk dinë më shumë për të.
Kjo është Edita Doli, moderatorja, e cila me plot optimizëm jo vetëm në fund të emisionit të saj u drejtohet dëgjuesve: Dhuroni sa më shumë dashuri, por pa hile!
Edita karakterizohet nga një zë i ëmbël, që depërton shumë lehtë e thellë te dëgjuesit, teksa u jep emocione të shumta dhe u falë ngrohtësi pafund dëgjuesve të emisionit ‘Radar’, shkruan kosovarja.
Si të rralla moderatore, ajo di të komunikojë me dëgjuesit e shumtë, duke i bërë sa më optimistë dhe gjithnjë e më tepër të “dashuruar” në zërin e fjalët e saj.
Për Editen puna si moderatore është një punë, e cila kërkon përkushtim e seriozitet të veçantë, pasi nuk është e lehtë t’i bësh dëgjuesit të ndjekin nëpërmjet frekuencave të radios, por falë edhe stafit me një eksperiencë të madhe, me punëtorë profesionalë e të kualifikuar, deri tanimë ia ka dal mbanë.
