Gjyqtari i Gjykatës së Beratit u pezullua ditën e djeshme, pasi sipas Prokurorisë së Krimeve të Rënda, i ka kërkuar seks një qytetareje që ishte në proces divorci dhe çështja ishte në dorën e tij.
Shyqyri Çobo e ka marrë atë rreth 300 herë në telefon si dhe i ka dërguar qindra mesazhe. Prokuroria thotë se, në këto biseda gjyqtari Shyqyri Çobo lë të kuptohet që kërkon favore seksuale, madje dje u publikuan edhe mesazhet që ai i kishte dërguar gruas.
Ndërkohë, avokati Saimir Vishaj ka postuar një status duke e dënuar këtë akt, ndërsa poshtë tij ka komentuar një vajzë, e cila ka thënë se edhe ajo është provokuar nga ai, por nuk ka marrë guximin që ta denoncojë.
“S’ka nevojë për shumë komente z.Sajmir. Akuza kundrejt zoterisë në fjalë është mëse e vërtet .Unë jam një nder ato gra apo nëna që zgjidhjen e martesës e ka gjykuar ky zotëri dhe ju e dini që s’jam e vetmja që jam provokuar prej tij. Por hallet e problemet e mia me bënin që t’ia harroja ‘surratin’ e të mendoja për më tej për jetën time…(ose ndoshta nuk gjeta kurajo të bëja të njëjten gjë)”, janë këto fjalët e vajzës.
Ndoshta këto nuk janë femrat e vetme që janë ngacmuar seksualisht nga Shyqyriu, por me kalimin e kohës do të zbulohen denoncime të tjera. /Telegrafi/
