Departamenti i policisë në Los Angeles ka publikuar të hënën pamjet brenda një marketi, ku ndodhën të shtënat që ishin fatale për një vajzë 14-vjeçe që u qëllua aksidentalisht nga policia.
Zyrtarët policorë thanë se 14-vjeçarja Valentina Orellana-Peralta u vra nga plumbi që goditi murin dhe më pas përfundoi në trupin e saj, transmeton Telegrafi.
Gjithçka ndodhi kur policët po qëllonin mbi një mashkull të dyshuar, e plumbi goditi vajzën. Bëhet fjalë për Daniel Elena-Lopez, 24-vjeç i cili kishte kryer disa sulme nëpër dyqane dhe po mbante një kabllo në dorë, kur policia arriti në vendin e ngjarjes.
Në videon 35 minutëshe të publikuar nga policia e Los Angeles, gjak dhe britma shihen e dëgjohen brenda marketit ku në ato momente Valentina ishte fshehur me të ëmën në zhveshtore – pikërisht pas murit ku zyrtari policor qëlloi për vdekje Elena-Lopezin.
“Gjatë kontrollit shtesë të dyshuarit, policët gjetën një vajzë e cila kishte qëlluar afër kur ndodhën të shtënat dhe ishte shpallur e vdekur në vendin e ngjarjes”, tha kapiteni Stacy Spell.
“Faza preliminare e hetimeve ka konstatuar se viktima ishte fshehur pas murit ku kishin ndodhur të shtënat. Në policinë e Los Angeles shprehim ngushëllime të sinqerta për vdekjen e vajzës – Valentina Orellana-Peralta. Nuk ka fjalë të përshkruhet pikëllimin që e ndjejmë për këtë rast tragjik”, tha ndër tjera kapiteni. /Telegrafi/
