Pas kalimit historik të kufirit të Koresë së Veriut në Korenë e Jugut, Kim Jong-un u zhvendos në Shtëpinë e Paqes ku u regjistrua në librin për miq.
Siç shkruajnë mediat e huaja, përcjell Telegrafi, në libër ai ka shkruar: “Historia e re fillon tani. Kohë e paqes, në fillim të historisë”.
Sipas mediave të huaja, bisedimet kanë zgjatur dy orë pas mbylljes së derës së sallës së ridizajnuar për takimin.
Në një deklaratë dhënë mediave para takimit, Kim ka thënë se dëshiron të vizitojë Shtëpinë Blu presidenciale në Seul.
“Moon i ka thënë Kim-it se nëse shkon në Seul, një roje nderi ushtarake do të ishte shumë më e madhe se sot, e Kim i është përgjigjur se ishte gati të vinte në çdo kohë”, tha zëdhënësi i Presidencës së Koresë së Jugut, Yoon Young-chan.
Dhe gjatë shtrëngimit të duarve, gazetarët arritën të dëgjonin një pjesë të bisedës që po zhvillohej. Të dy udhëheqësit thanë se ishin të lumtur që u takuan.
“Zemra nuk po më qetësohet nga emocionet,…”, citohet të jetë shprehur Kim Jong-un.
E Moon thuhet se i ka thënë atij se ishte një vendim i guximshëm për të ardhur në këtë zonë.
“Ky është një moment historik”, tha Presidenti i Koresë së Jugut, Moon.
Motra më e vogël e Kim, Kim Yo Jong ishte gruaja e vetme midis gjashtë delegatëve që u ulën në tryezën e negociatave. Ajo me kujdes e regjistroi gjithçka që tha vëllai i saj.
Zëdhënësi Yoon tha se bisedimet zgjatën për 100 minuta dhe ata ishin të hapur dhe u përqendruan në denuklearizimin. Diskutimi kishte të bënte me paqen e qëndrueshme dhe mënyrat e përmirësimit të marrëdhënieve. /Telegrafi/