Kidnapuesi, i cili e kishte marrë peng modelen britanike, Chloe Ayling, është inspiruar nga një film hollivudian. Lukasz Herba e kishte droguar, rrëmbyer dhe e kishte ofruar 20-vjeçaren për shpërblesë në një ngjarje tronditëse.
Herba, i cili është nga Polonia, është dënuar me 16 vjet burg të hënën, pasi është shpallur fajtor në një gjykatë italiane.
Chloe i ishte përgjigjur një ftese për një fotosesion mode në Milano, i cili ishte i rrejshëm dhe me këtë rast është kidnapuar, është droguar, është transportuar me veturë dhe është mbajtur me dhunë në një shtëpi në qytetin e Torinos.
Kidnapuesi kishte thënë se qëllimi i kidnapimit ka qenë për ta bërë të famshëm, mirëpo prokurorët kanë thënë se ajo ka mundur të vdesë gjatë kohës së rrëmbimit, nga 11 korriku deri më 17 korrik të vitit të kaluar.
Pas dënimit të Herbas, është mësuar kidnapimi ishte i ngjashëm me një film hollivudian të lansuar disa javë para se të ndodhte rrëmbimi.
Filmi “By Any Means” tregon ngjarjen e Mimi Wyatt (që luhet nga Brooke Burfitt), një yll jo shumë i njohur që kidnapohet pas një performance në një klub nate.
Kidnapuesi i saj, Frank Watson (që portretizohet nga Thomas Gipson) e mban të rrëmbyerën e tij, mirëpo kur autoritetet e lirojnë nisin dyshimet nëse ngjarja ka nisur për të arritur famë.
Një zëdhënës i Triventure Films, ka thënë se ngjashmëria mes filmit dhe ngjarjes reale i ka shokuar filmbërësit.
“Triventure Films ka mësuar se filmi ynë ‘By Any Means’ e ka frymëzuar kidnapuesin e dënuar, Lucasz Herba, që ta joshë modelen Chloe Ayling drejt Italisë për një fotosesion dhe e ka mbajtur të rrëmbyer për shpërblesë”.
“Filmi ynë ishte lansuar tetë javë para rrëmbimit në korrikun e vitit 2017 dhe ngjashmëritë na kanë tronditur”, ka deklaruar zëdhënësi i shtëpisë filmike.
Edhe në film edhe në ngjarjen reale kidnapuesit kanë kërkuar para, në të dyja rastet të kidnapuarat e kanë humbur vetëdijen dhe kur janë zgjuar e kanë kuptuar se janë të rrëmbyera, ndërsa kidnapuesit në të dyja rastet kanë pasur për qëllim që të përfitojnë edhe famë nga ngjarja. /Telegrafi/
