Toronto Raptors ka arritur ta përmbyllë në mënyrë fantastike gjysmëfinalen e dytë të konferencës së Lindjes në NBA.
Skuadra kanadeze pas shtatë ndeshjeve ka eliminuar Miami Heat dhe ka kaluar në finale të Lindjes ku do të takohet me Cleveland Cavaliers.
Ndeshja e shtatë ishte fantastike për Raptors të cilët u futën në ndeshje në barazim të serive 3:3, ndërsa triumfuan me rezultat të lartë 116:89.
Kyle Lowry ishte më meritori për këtë fitore të Toronto Raptors, pasi shënoi 35 pikë në këtë përballje duke shtuar edhe shtatë kërcime dhe nëntë asistime.
Me paraqitje fantastike u dallua edhe DeRozan që realizoi 28 pikë, bëri tetë kërcime si dhe pati një asistim.
Me pikë dy shifrore për Raptors ishin edhe Patterson me 11, Caroll me 14 dhe qendra e fuqishme Biyombo që shënoi 17 pikë dhe bëri 16 kërcime.
Tek Miami më të mirët ishin Dwayne Wade dhe Goran Dragic me nga 16 pikë por të pa mjaftueshme për të kaluar tutje.
Në ndeshjen finale të konferencës së Lindjes Toronto do të luajë përballë Cleveland Cavaliers, ndërsa në finalen e Perëndimit do të përballen Oklahoma City Thunder dhe Golden State Warriors. /Telegrafi/
