Gjëndra tiroide është në pjesën e përparme të qafës dhe luan një rol jetik në rregullimin e rrahjeve të zemrës, temperaturës së trupit, metabolizmit, prodhimit të energjisë dhe ciklit menstrual
Sëmundja e Hashimotos është një gjendje autoimune në të cilën sistemi juaj imunitar sulmon gabimisht një gjëndër, duke reduktuar prodhimin e hormoneve tiroide dhe shkaktuar simptoma që prekin të gjithë trupin tuaj.
“Simptomat më së shpeshti përfshijnë lodhjen, ndjeshmërinë ndaj të ftohtit, rënien e flokëve, mjegullimin e trurit dhe ndryshimet në peshë”, thotë Kat Garcia-Benson, një dietologe nutricioniste e regjistruar.
“Ndryshimet në dietë janë një pjesë e rëndësishme e menaxhimit të tiroiditit të Hashimotos”, thotë Corale Naor, një dietologe e regjistruar që jeton me këtë gjendje.
“Ushqimet e plota të pasura me lëndë ushqyese, si frutat, perimet, proteinat pa yndyrë, drithërat dhe yndyrnat e shëndetshme si avokado dhe arrat duhet të përfshihen në një dietë për sëmundjen e Hashimotos.” Megjithatë, dy lëndë ushqyese – seleni dhe vitamina D – ndihmojnë në mënyrë specifike në përmirësimin e funksionit të tiroides dhe në menaxhimin e kësaj gjendje, shkruan Eating Well.
Lexoni më poshtë për të mësuar pse nuk duhet t’i neglizhoni këto lëndë ushqyese nëse keni sëmundjen e Hashimotos.
1. Seleni
Hulumtimet kanë zbuluar se seleni mund të jetë veçanërisht i dobishëm për njerëzit me sëmundjen e Hashimotos. “Seleni është një mineral thelbësor që vepron si një antioksidant dhe ndihmon në rregullimin e metabolizmit të hormoneve tiroide, duke reduktuar potencialisht antitrupat tiroide dhe nivelet e hormonit stimulues të tiroides (TSH) te pacientët e Hashimotos”, thotë Naor.
Ky mineral i rëndësishëm lidhet natyrshëm me proteinat, kështu që zgjedhja juaj më e mirë për të rritur marrjen e selenit është të përqendroheni në ushqimet me shumë proteina. Seleni gjendet në ushqimet e detit, mish, shpendët, vezët, produktet e qumështit dhe produktet e drithërave të fortifikuara si drithërat dhe buka.
2. Vitamina D
“Vitamina D është e rëndësishme për rregullimin imunitar, duke mbështetur aftësinë e trupit për të menaxhuar aktivitetin autoimun”, thotë Benson. Hulumtimet sugjerojnë një lidhje midis mungesës së vitaminës D dhe sëmundjeve autoimune të tiroides si ajo e Hashimotos. Dhe vitamina D mund të jetë edhe më e rëndësishme për femrat. Disa kërkime sugjerojnë se mungesa e vitaminës D mund të lidhet me sëmundjet autoimune më të zakonshme tek femrat, siç është Hashimoto. Vitamina D gjithashtu mund të ketë një efekt mbrojtës kur shoqërohet me estrogjen.
Kur ekspozohet ndaj rrezeve ultravjollcë të diellit, vitamina D (vitamina e diellit) prodhohet nga trupi juaj. Mund ta gjeni natyrshëm në ushqime, por lista është goxha e kufizuar. Disa ushqime të pasura me vitaminë D përfshijnë peshkun me yndyrë (si salmoni dhe toni), mishi i viçit, veza, djathi, kërpudha dhe drithërat e fortifikuara.
Përveç kalimit të disa minutave në ditë në rrezet e diellit, këto receta janë mënyra të mira për të rritur marrjen e dozës që ju duhet.
Këshilla të tjera për të mbështetur shëndetin tuaj të tiroides
Ndërsa vëmendja ndaj të ushqyerit është një domosdoshmëri kur bëhet fjalë për shëndetin tuaj të tiroides, dietologët e regjistruar rekomandojnë gjithashtu disa këshilla shtesë.
“Për të menaxhuar tiroiditin e Hashimotos ose për të përmirësuar shëndetin e tiroides, është thelbësore të reduktoni nivelet e stresit, t’i jepni përparësi gjumit, të angazhoheni në aktivitet të rregullt fizik dhe të praktikoni teknika të ndërgjegjes si meditimi”, thotë Naor.
“Mbajtja e një diete të ekuilibruar, hidratimi dhe shmangia e ushqimeve të përpunuara mund të mbështesë gjithashtu shëndetin e përgjithshëm të tiroides.”
Sipas Benson, këtu është një listë e dobishme e këshillave për shëndetin optimal të tiroides:
Jepini përparësi gjumit dhe pushimit: Gjumi i dobët dhe stresi kronik mund të përkeqësojnë inflamacionin dhe lodhjen.
Monitoroni vlerat laboratorike: Punoni me mjekun tuaj për të siguruar që nivelet e hormoneve të tiroides janë brenda një diapazoni të shëndetshëm dhe që lëndët ushqyese që lidhen me shëndetin e tiroides, si jodi, hekuri, vitamina D dhe seleni, janë të optimizuara.
Qëndroni aktivë: Ushtrimi i vazhdueshëm mund të ndihmojë në parandalimin ose zbutjen e problemeve dytësore që mund të lindin me Hashimoto-n. Ju mund të mbeteni absolutisht aktivë dhe atletikë ndërsa menaxhoni këtë gjendje!
Fokusohuni në një marrëdhënie pozitive me ushqimin: Në vend që të ndiqni rregullat strikte ose perfeksionizmin, synoni modele të të ngrënit që i japin përparësi shumëllojshmërisë, ushqimit dhe kënaqësisë.
Përfundimi
Përqendrimi në ushqimet e pasura me vitaminë D dhe selen është një hap i parë i shkëlqyeshëm për të ndihmuar në zbutjen e simptomave të tiroiditit Hashimoto. Megjithatë “është e rëndësishme të kërkoni udhëzime si nga një mjek i kualifikuar ashtu edhe nga një dietolog i regjistruar”, thotë Naor.
“Një mjek mund të ndihmojë me menaxhimin e ilaçeve dhe monitorimin e funksionit të tiroides, ndërsa një dietolog mund të ofrojë rekomandime të personalizuara dietike për të mbështetur shëndetin e tiroides dhe mirëqenien e përgjithshme.”
Benson thekson se asnjë dietë e vetme nuk mund të shërojë Hashimoto-n, por optimizimi i marrjes së lëndëve ushqyese dhe shikimi i nxitësve të mundshëm dietikë mund të përmirësojë simptomat, citon Anabel.
“Trajtimi i mangësive të lëndëve ushqyese mbështet rikuperimin dhe promovon shëndetin e përgjithshëm, gjë që ndihmon në reduktimin e stresit në trup. Menaxhimi i stresit është i rëndësishëm pasi mund të përkeqësojë kushtet autoimune apo edhe të shkaktojë të tjera.” /Telegrafi/