Këshilli Organizativ për shënimin e 10 vjetorit të Pavarësisë së Kosovës, në një konferencë për media ka bërë publike agjendën e festimeve për këtë vit jubile.
Ardian Arifaj nga ky këshill ka bërë të ditur se krijimi i agjendës për këtë vit jubilar është bërë nga të gjitha institucionet e vendit.
“Ka qenë një punë intensive e të gjitha institucioneve që me përgatit një program sa më të mirë për këtë jubile të parë të Kosovës. Ky festim për 10 ditë që do të zgjasë do të hedh në dritë të gjitha të arriturat e Kosovës si shtet në këto 10 vite”, ka thënë Arifaj.
Ai ka shtuar se sonte do të zbukurohen ndërtesat e sheshit “Nënë Tereza” me drita, shkruan Telegrafi.
Po ashtu Arifaj ka theksuar se duke qenë që sot është dita e dashuruarve në sheshet e kryeqytetit janë vendosur disa instalacione ku shprehet jo vetëm dashuria e qifteve por edhe dashuria për shtetin.
Arifaj ka bërë të ditur se të shtunën më datë 17 shkurt do të jenë aktivitet kryesore për shënimin e këtij 10 vjetori të Pavarësisë.
“Më 17 shkurt do të ketë një seancë solemne të Qeverisë, Kuvendit, pastaj do të kemi paradën e FSK-së dhe Policisë në sheshin Nënë Terezë, një pjesë artistike kulturore, dhe do të kulmoj në fund me koncertin e Rita Orës në orën 22:00”, u shpreh Arifaj.
Ai theksoi se të dielën do të ketë një pritje solemne nga ana e presidentit Hashim Thaçi për personalitetet që kanë kontribuar në pavarësinë e Kosovës. /Telegrafi/