Shitja e energjisë po bëhet me çmimin rreth 35 euro për megavat orë, te dy kompanitë zvicerane EFT dhe EGL, të cilat u shpallën fituese në tenderin ndërkombëtar për janarin.
“Ne po shesim energji me Bursën greke minus 2.6 për qind që janë humbjet në transmetim. Ky çmim është 12 euro më i lartë se çmimi me të cilin OSSH-ja e blen energjinë nga ne”,- deklaron Stojku. Sipas tij, eksporti i energjisë do të vazhdojë në këto nivele deri në fund të muajit, në varësi edhe të situatës hidrike në vend.
Tashmë prej një viti Korporata Elektroenergjetike Shqiptare po bën eksport energjie. Shitja ka nisur më 11 janar 2009 dhe gjatë vitit që lamë pas u eksportuan mesatarisht rreth 3 milionë kilovat orë në ditë. Por me fillimin e këtij viti, eksporti ka arritur nivelet rekord për shkak të reshjeve të dendura të shiut gjatë javëve të fundit.
Eksporti i energjisë gjatë gjithë periudhës 12 mujore i ka siguruar KESH-it të ardhura të konsiderueshme, të cilat do të përdoren për të shlyer borxhet.
“Gjatë vitit 2009, nga eksporti i energjisë u mblodhën rreth 25 milionë euro. Ne parashikojmë që këtë vit kjo shumë të dyfishohet. Të ardhurat që grumbullohen nga shitja e energjisë do të përdoren për të shlyer borxhet e KESH-it, për energjinë që ka blerë në periudhën 2007-2008 kur ishte thatësirë“,- shpjegon kreu i korporatës, Stojku.