Kryetari i Mitrovicës, Agim Bahtiri, në prill të këtij viti, me vetiniciativë e ka shuar kompaninë për kultivimin e kërpudhave, ndonëse ajo as që ia kishte filluar punën.
Tribuna Channel posedon një dokument ku shkruan se me vendim të Agim Bahtirit dhe aksionarit të kësaj kompanie Hee Joo Park nga Koreja Jugore, kanë nënshkruar shuarjen e kompanisë “Green Mushroom Farm-Kosova” SH.P.K në Mitrovicë.
Televizioni ka kontaktuar me Bahtirin, mirëpo ai ka mohuar se kjo gjë është e vërtetë. Përgjigja e tij ka qenë se në Komunën e Mitrovicës “ka dhe do të ketë shumë investime”. Por, nuk ofruar dëshmi që kompania në fjalë vazhdon të jetë në regjistrat e bizneseve në Ministrinë e Tregtisë dhe Industrisë.
Ndryshe prej tij, kryetari i Degës së PDK-së në Mitrovicë, Avni Kastrati, thotë se ka fakte që Bahtiri e ka bërë një gjë të tillë. Sipas tij, Bahtiri ka vepruar kështu për shkak se situata ekonomike në Komunën e Mitrovicës po bëhet çdo ditë e më e vështirë. /GazetaTribuna/