Knaus ka thënë se tashmë para Kosovës shtrihen detyra më të rëndësishme – ku fillimisht ka numëruar ekonominë – e cila sipas tij ende nuk është në rrugë të drejtë, dhe ndërtimi i institucioneve – siç është Ministria e Punëve të Jashtme.
“Ajo (MPJ) duhet të fillojë jo vetëm të ekzistojë, por edhe të performojë. Dhe, si prioritet kryesor i politikës së jashtme, duhet të jetë sigurimi i njohjeve nga pesë shtetet e BE-së që ende nuk e kanë njohur Kosovën, në mënyrë që të hapet rruga ka integrimet evropiane”, ka thënë ai.
Madje, sipas Knausit, njohja nga këto pesë shtete të BE-së, është shumë më e rëndësishme, sesa njohja nga 20 shtete tjera të botës. “Kjo i lejon Kosovës që t’i ndjekë vendet e rajonit në rrugën drejt integrimit evropian”, ka thënë ai.
Knaus po ashtu ka thënë se prioritet në vitin 2009 duhet të jetë ruajtja e stabilitetit dhe puna. “Shpresoj shumë se do të ruhet stabiliteti i 2008-ës dhe që ky stabilitet të mos kthehet në stagnim. Kërcënimi kryesor për Kosovën është nëse gjërat nuk ndryshojnë mjaftueshëm. Kosova ka nevojë për ndryshime dramatike, jo të dhunshme në frontin diplomatik, por edhe brenda Kosovës”, ka thënë Knaus, duke marrë si shembull këtu reformimin e nevojshëm të sistemit arsimor.
Kjo, sipas tij, do ta ndryshonte imazhin e Kosovës jashtë dhe shpresoj se fundi i vitit 2009 do ta çojë Kosovën më afër perspektivës evropiane, përfshirë regjimin e lirë të vizave. /Telegrafi/