Një tjetër person është hedhur nga kati i dytë i spitalit ku po trajtohej për shkak të infektimit me coronavirus.
Ngjarja e rëndë është shënuar mesditën e sotme, në spitalin ku trajtohen të infektuarit me ‘COVID19’ (QSUT), në kryeqytet.
Top Channel mëson se pacienti R.B, 69-vjeçar, është hedhur nga kati i dytë i spitalit, ndërsa sipas policisë ai, për momentin ndodhet nën kujdesin e mjekëve.
Pranë këtyre ambienteve kanë shkuar forca të shumta policie, të cilët kanë rrethuar zonën dhe po hetojnë lidhur me këtë rast.
Kujtojmë se ky është rasti i katërt që pacientë të infektuar hidhen nga lartësia e spitalit ku trajtoheshin me COVID-19.
Fatkeqësisht tre rastet e mëparshme kanë qenë tragjike.